സുബ്രതോ കപ്പിൽ കേരള മുത്തം

അണ്ടർ 17 സുബ്രതോ കപ്പ് ഫുട്ബാളിൽ ആദ്യമായി കേരളം ജേതാക്കൾ

ന്യൂഡൽഹിയിൽ നടന്ന സുബ്രതോ കപ്പ് ദേശീയ സ്കൂൾ ഫുട്ബാൾ ടൂർണമെന്റിൽ അണ്ടർ 17 ആൺകുട്ടികളുടെ വിഭാഗത്തിൽ കിരീടം ചൂടി കേരളം. ചരിത്രത്തിൽ ആദ്യമായാണ് കേരളം സുബ്രതോ കപ്പ് സ്വന്തമാക്കുന്നത്. ഗോകുലം കേരള എഫ്.സി പരിശീലനം നൽകുന്ന കോഴിക്കോട് ഫാറൂഖ് ഹയർ സെക്കൻഡറി സ്കൂളാണ് ടൂർണമെന്റിൽ കേരളത്തെ പ്രതിനിധീകരിച്ച് പങ്കെടുത്തത്. ഫൈനലിൽ സി.ബി.എസ്.ഇയെ പ്രതിനിധീകരിച്ച് ഇറങ്ങിയ അമിനിറ്റി സ്കൂളിനെയാണ് കേരളം കീഴടക്കിയത്. മറുപടിയില്ലാത്ത രണ്ട് ഗോളുകൾക്കായിരുന്നു വിജയം.

ചാമ്പ്യന്മാർ ഒത്തുകൂടി 33 കൊല്ലത്തിന് ശേഷം

1992 ൽ ഇന്റർ യൂണിവേഴ്സിറ്റി സൗ‌ത്ത് സോൺ ഫുട്ബോൾ ചാമ്പ്യൻഷിപ്പിൽ കിരീടം നേടിയ കേരള യൂണിവേഴ്സിറ്റി ടീമിലെ താരങ്ങൾ 33 വർഷത്തിന് ശേഷം വീണ്ടും ഒരുമിച്ചു. സ്വാതന്ത്യദിനത്തിൽ യൂണിവേഴ്സിറ്റി സ്റ്റേഡിയത്തിലാണ് ചാമ്പ്യന്മാരുടെ സൗഹൃദ സംഗമം നടന്നത്. കേരള യൂണിവേഴ്സിറ്റി രൂപീകൃതമായതിന് ശേഷം ആദ്യമായി സൗ‌ത്ത് സോൺ ഫുട്ബോൾ ചാമ്പ്യന്മാരാകുന്നത് 1992ലാണ്.കാലിക്കറ്റ് യൂണിവേഴ്സിറ്റിയെയും, മഹാത്മഗാന്ധി യൂണിവേഴ്സിറ്റിയെയും, മദ്രാസ് യൂണിവേഴ്സിറ്റിയെയും തോൽപ്പിച്ചായിരുന്നു കേരളയുടെ പടയോട്ടം.

 

മുൻ സന്തോഷ്ട്രോഫി താരം എം.ബാബുരാജിന് വിട

മുൻ സന്തോഷ് ട്രോഫി ഫുട്ബോൾ താരവും കേരള പൊലീസ് റിട്ട. അസിസ്റ്റന്റ് കമാൻഡന്റുമായ അന്നൂരിലെ എം.ബാബുരാജ് നിര്യാതനായി. 60 വയസായിരുന്നു. 1964ൽ അന്നൂരിൽ ജനിച്ച ബാബുരാജ് പയ്യന്നൂർ കോളേജ് ടീമിലൂടെയാണ് ഫുട്ബോളിൽ മികവ് കാട്ടിത്തുടങ്ങിയത്. പയ്യന്നൂർ കോളേജ് ടീം ക്യാപ്ടനുമായിരുന്നു.

കേരള പ്രിമിയർ ലീഗ് ഫുട്ബാൾ കിരീ‌ടം മുത്തൂറ്റിന്

കോഴിക്കോട് നടന്ന കേരള പ്രീമിയർ ലീഗ് ഫുട്ബാൾ ഫൈനലിൽ കേരള പൊലീസിനെ ഒന്നിനെതിരെ രണ്ട് ഗോളുകൾക്ക് തോൽപ്പിച്ച് മുത്തൂറ്റ് എഫ്.എ. വിജയകിരീടം ചൂടി. മുത്തൂറ്റിന് വേണ്ടി എസ്. ദേവദത്ത്, കെ.ബി. അബിത്ത് എന്നിവർ ഗോൾ സ്‌കോർ ചെയ്തപ്പോൾ പൊലീസിനായി എൻ.എസ്.സുജിലാണ് സ്കോർ ചെയ്തത്..