എഫ്‌.ഐ.സി.സി.ഐ ടർഫ് 2024 ഗ്ലോബഅ സ്‌പോർട്‌സ് സമിറ്റിൽ സ്‌പോർട്‌സിനെ പ്രോത്സാഹിപ്പിക്കുന്ന മികച്ച വിദ്യാഭ്യാസ സ്ഥാപനത്തിനുള്ള പുരസ്‌കാരം തിരുവനന്തപുരം കാര്യവട്ടം ലക്ഷ്മി ബായി നാഷണൽ കോളേജ് ഓഫ് ഫിസിക്കല്‍ എഡ്യുക്കേഷൻ (LNCPE) സ്വന്തമാക്കി. ന്യൂഡൽഹിയിലെ ഫെഡറേഷൻ ഹൗസിൽ നടന്ന ചടങ്ങിൽ ബഹുമതി എൽ.എൻ.സി.പി.ഇ പ്രിൻസിപ്പലും സായ് റീജിയണൽ ഡയറക്ടറുമായ ഡോ. ജി. കിഷോർ ഏറ്റുവാങ്ങി . കായിക വിദ്യാഭ്യാസവും ഗവേഷണവും ലോകോത്തര നിലവാരത്തിലേക്ക് ഉയർത്തുന്നതിലെ നിരന്തര പരിശ്രമത്തിന്റെ ഫലമാണ് ഈ അംഗീകാരം. ഇന്ത്യയിലെ കായിക വിദ്യാഭ്യാസം, കായിക പരിശീലനം, ഗവേഷണം എന്നീ മേഖലകളിൽ നൽകിയ അംഗീകാരമാണ് ഈ അവാർഡെന്നും ഈ നേട്ടം, ഭാരതത്തിന്റെ കായിക ഭാവിയെ ഉയർത്താനുള്ള തങ്ങളുടെ പ്രതിജ്ഞാചൈതന്യത്തെ കൂടുതൽ പ്രോത്സാഹിപ്പിക്കുമെന്നും എന്ന് ഡോ. കിഷോർ പറഞ്ഞു.
സായ് നാഷണൽ സെന്റർ ഓഫ് എക്‌സലന്‍സ് (NCOE) ആകർഷകമായ പരിശീലന പദ്ധതികൾ വഴി ദേശീയ-അന്തർദേശീയ തലങ്ങളിൽ മികച്ച താരങ്ങളെ സൃഷ്ടിച്ചിട്ടുണ്ട്. അത്‌ലറ്റിക്‌സ് , ബാഡ്മിന്റൺ, ബോക്‌സിംഗ്, ഹോക്കി, ജൂഡോ, റ‌സ്‌ലിംഗ് എന്നീ വിഭാഗങ്ങളിലാണ് പരിശീലനം. കോവിഡ് മഹാമാരിക്കാലത്ത് ഓൺലൈൻ പരിശീലന പരിപാടിയിലൂടെ 75,000-ത്തിലധികം ഫിസിക്കൽ എജുക്കേഷൻ അധ്യാപകരെയും കമ്മ്യൂണിറ്റി കോച്ചുമാരെയും ലഭ്യമായ ഉപകരണങ്ങൾക്കൊണ്ട് പരിശീലിക്കാൻ പ്രാപ്തരാക്കി ആഗോള തലത്തിൽ ശ്രദ്ധ നേടിയിരുന്നു. ഇന്റർനാഷണൽ സൊസൈറ്റി ഫോർ കമ്പാരറ്റീവ് ഫിസിക്കൽ എജുക്കേഷൻ ആൻഡ് സ്പോർട് (ISCPES), ഇന്റർനാഷണൽ കൗൺസിൽ ഓഫ് സ്പോർട്സ് സയൻസ് ആൻഡ് ഫിസിക്കൽ എജുക്കേഷൻ (ICSSPE) എന്നിവയുമായി ആഗോള സഹകരണം പുലർത്തിവരുന്നു.