കേന്ദ്ര കായികസഹമന്ത്രി രക്ഷാ നിഖിൽ ഖഡ്സെ സംസ്ഥാനത്തെ കായിക വികസന പദ്ധതികൾ വിലയിരുത്താനായി തലസ്ഥാനത്തെത്തി. കാര്യവട്ടം സായ് എൽ.എൻ.സി.പി.ഇ സന്ദർശിച്ച ക്യാമ്പസിലെ പുതിയ മെഡിക്കൽ സെന്റർ കെട്ടിടം ഉദ്ഘാടനം ചെയ്ത മന്ത്രി എസ്. ഗോപിനാഥ്,സജി തോമസ്,ഓമന കുമാരി എന്നിവരെയും ദേശീയ അന്തർദേശീയ തലങ്ങളിൽ മികവ് പുലർത്തിയ നാഷണൽ സെന്റർ ഒഫ് എക്സലൻസിലെ കായികതാരങ്ങളെയും മന്ത്രി ആദരിച്ചു.

ജിസ്ന മാത്യു, ശുഭ വെങ്കിടേശൻ, രഞ്ജിത,നിത്യാ ഗന്ധേ, അഭിനയ രാജരാജൻ, സ്നേഹ എസ്.എസ്,റിൻസ് ജോസഫ്, മനു ടി.എസ്.,നിറൈമതി തുടങ്ങിയ അത്‌ലറ്റിക്സ് താരങ്ങളും ഏഷ്യൻ ട്രാക്ക് സൈക്ലിംഗ് ചാമ്പ്യൻഷിപ്പിൽ വെങ്കലം നേടിയ താരങ്ങളും വോളിബാൾ താരങ്ങളും പാരാ-തായ്ക്കൊണ്ടോയിൽ അന്താരാഷ്ട്ര മത്സരങ്ങൾക്കായി തിരഞ്ഞെടുക്കപ്പെട്ട ലവ് ഗോച്ചറും ചടങ്ങിൽ ആദരിക്കപ്പെട്ടു. എൽ.എൻ.സി.പി.ഇ പ്രിൻസിപ്പാളും റീജിയണൽ ഡയറക്ടറുമായ ഡോ. ജി. കിഷോർ, സായ് ഡയറക്ടർമാരായ സി. ദണ്ഡപാണി,രവി എൻ. എസ് എന്നിവർ സംസാരിച്ചു.

പരിസ്ഥിതി സംരക്ഷണ പ്രതിജ്ഞയുടെ ഭാഗമായി എൽ.എൻ.സി.പി.ഇ ക്യാമ്പസിൽ മന്ത്രിയുടെ നേതൃത്വത്തിൽ വൃക്ഷതൈ നട്ടു. തായ്ക്കൊണ്ടോ , കളരിപ്പയറ്റ്, യോഗ, തുടങ്ങിയ വിവിധ കായികവിഭാഗങ്ങളിലെ പ്രകടനങ്ങളും എക്‌സിബിഷൻ വോളിബോൾ മത്സരവും മന്ത്രി വീക്ഷിച്ചു. തുടർന്ന് കായികതാരങ്ങളും പരിശീലകരുമായി സംവദിച്ച മന്ത്രി കവടിയാറിലെ ഗോൾഫ് അക്കാഡമിയും സന്ദർശിച്ചു. പത്മനാഭസ്വാമി ക്ഷേത്രത്തിൽ ദർശനം നടത്തിയാണ് മന്ത്രി മടങ്ങിയത്.